Улс тунхагласны баярын өдрийг тохиолдуулан
“Иргэний андгай өргөх ёслол”-ын үйл ажиллагааг Монголын залуучуудын холбооны санаачилгаар МУ-ын ерөнхий сайдын ивээл дор 19 дэх жилдээ зохион байгуулж байна.
“Монгол Улсын иргэний андгай өргөх ёслол”-ыг орон даяар нэгэн зэрэг зохион байгуулж тухайн жилд 16 нас хүрч буй хүүхдүүдэд иргэний үнэмлэхийг нь гардуулдаг уламжлалтай.
Ховд аймгийн хэмжээнд нийт 1074 хүүхэд 16 нас хүрч байна. Энэхүү арга хэмжээнд сургууль сургуулийн төлөөлөл болсон 180 сурагч оролцож, Монгол улсын иргэний андгай өргөн, зарим сурагчид Монгол улсын иргэний үнэмлэхээ гардан авлаа.
Энэ үеэр аймгийн Засаг дарга Б. Дүгэржав болон зохион байгуулж буй албаны төлөөлөл хүрэлцэн ирж, мэндчилгээ дэвшүүлэн баяр хүргэлээ.
Андгай өргөх ёслолын ач холбогдлыг түүх, соёл, өв уламжлалаараа бахархдаг, Монгол гэсэн бүхнээ эрхэмлэн дээдэлсэн, эх оронч сэтгэлтэй, хариуцлагатай, дараагийн шинэ залуу иргэнээ Монгол Улс хүлээж авч буй явдал хэмээн тодорхойлсон байдаг.
Мөн энэхүү арга хэмжээнд Ховд их сургуулийн Боловсрол судлал, арга зүйн тэнхимийн эрхлэгч доктрант Б. Дорж хүрэлцэн ирж “Хувь хүний хөгжил-Ур чадвар” сэдвээр илтгэл тавьсан юм.
Энэ арга хэмжээг аймгийн Засаг даргын тамгын газар, Ховд аймгийн залуучуудын холбооны төлөөлөл, улсын бүртгэлийн хэлтсийн албан хаагчдаас хамтран зохион байгуулж оролцлоо.
